Hoe lyk hy?

“Hoe lyk hy? Is hy lank? Dra hy bril? Is hy cool… ag kom nou, vertel, vertel, vertel!”

Sjoe al die vrae in een asem? Ja, hoe lyk is… hoe lyk hy?

Ek onthou dit nog soos gister, ander kon dit sien, ander kon dit aanvoel – hierdie ‘iets’ wat met my gebeur het. Hoe lyk hy? My hart het wild gebons, die wange blos, die oë wat glinster soos duisende sterretjies! Hoe beskryf ek dit… nee, hoe beskryf ek die man wat ek lief het. Vir my is hy die sterkste, die ‘mooiste’, die langste: die man wat my hart gesteel het. Vandag so byna 28 jaar later, laat hy nog steeds my hart klop!

Ek sit en dink: Ek weet nie eers hoe lyk die Een wat ek die liefste het nie? Hierdie Persoon wat my eerste liefgehad het. Hoe lyk Hy? Is Hy ook groot, is Hy sterk? Het Hy ook groot sterk arms? Is Hy die Man met die lang hare en sagte oë wat ons op elke kinder Bybel sien. Die Man met die lang wit kleed? Hoe lyk Hy?
Hierdie Man laat my hart klop. Wanneer gaan ek Hom sien? Sal ek Hom herken, sal ek weet dit is Hy wanneer ek Hom sien? Ek wonder?
Ek weet ek sal Sy hande uitken. Ek sal die merke sien, die teken wat vertel van Liefde. Ek sal Hom herken aan Sy voete. Die voete wat op die stofpaaie gestap het, die voete wat spreek van oorwinning. Dit is Sy voete wat my oorwinning gee om ook op slange en skerpioene te trap. Ek lees dat Sy voete die aarde as rusplek het. Dit is Sy voete wat diep spore in my hart getrap het. Die voete wat blink soos koper; maar hoe lyk Hy wat ek die liefste het?
Die Woord leer dat Sy hare so wit soos sneeu is en oë soos vuurvlamme. Daardie oë wat dwarsdeur mens kan kyk. Ai ek wonder? Ek staar net en ek dink.. Hoe lyk Hy?

Hoe gaan dit wees die dag wanneer ons van aangesig tot aangesig mekaar sal sien. Sal Hy my in Sy sterk arms optel en my teen Sy bors vasdruk. Sal Sy oë na my kyk en ek die liefdes vuur daarin kan sien. Ek droom van die dag…
Ek droom en verlang na die dag wat ons sal dans en dans en dans. Ek droom van die dag wat ons sal stap al langs die see… maar hoe lyk hierdie Man wat ek die liefste het, regtig?

Ek droom van hierdie Man, Jesus, wat ek die liefste het… en jy?

Ek wonder… wonder jy ook?

 

Die Here dink aan my!

Ek het al soveel keer in my lewe gewonder of die Here regtig aan my dink?  Is Hy bewus van my?  Elke oomblik? 

My vorige huishulp het altyd vertel hoe haar dokter haar vermaan het deur te se: Jy denk te veel.  Dit is so, soms ons ‘denk ok te veel’ – soos sy dit uitgedruk het. Dit waaraan ons dink is nie altyd iets om oor op en af te spring nie, soms maak dit ons hartseer,soms dink ons aan dae lank gelede, ander kere weer aan iets wat besig is om in ons lewens plaas te vind.  Tog is daar ook kere wat ons dink aan dit wat in ons Geestelike lewe aangaan…?

Waaraan dink jy?  Wat is in jou gedagtes vandag?  Wat maak dat jy sommer so in die verte in staar?  Wat is dan fout?  Wat pla?

Ek het goeie nuus!  Die Woord leer my in Psalm 40:18 – “Al is ek ellendig en behoeftig – die Here dink aan my”   Wow, is dit nie wonderlik nie…?  Dit maak nie vandag saak wat in jou lewe aangaan nie, die Here dink aan jou! 

Ek weet jy het gedink jou omstandighede is te ellendig of selfs te behoeftig.  Dit maak nie saak waarin jy jouself bevind nie… die Here dink aan jou!  Dit is amazing om te weet dat die God van die heelal aan ons dink.  Die Skepper van alle dinge, die Een wat ons so goed ken dat selfs die hare op ons hoof getel is.  Hy dink aan jou!  Hy dink aan my!!

Ek wil jou bemoedig; hou op om te dink aan al die ellende en behoeftes van jou lewe – dink eerder daaraan dat Hy aan JOU dink!  Hy is bewus van alles wat met jou aangaan. Hy is bewus van elke sug, elke pyn, elke bekommernis!  Hy is lief vir jou!  Hy gee om vir jou!  Hy dink aan JOU!!

Jy is kosbaar

Liefies

Karin

Alles, ek se jou…. alles!

Ek lees uit die Lewende Bybel –  1 Petrus 5:7: “Neem alles wat jou kwel na Hom toe en laat dit daar by Hom; want Hy het verantwoordelikheid geneem vir jou!”

Daar is tog so baie wat ons as mens kwel, as dit nie die werk is nie, is dit die kinders, of die huwelik.  Ja sowaar, dan kan ons ons tog so gou ook kwel oor  geld ( ja die geld wat nie eers daar is nie) en… en… ag sommer oor enige iets.  Dit is nou nie dat die media enigsens help om mens beter te laat voel nie, of jy nou die tv aanskakel of die radio, daar is altyd iets wat juis dit aanwakker waaroor jy jou kan kwel of sommer plain, WORRY!  Ai, dit is tog so aan die orde van die dag… almal kwel hulle oor iets of iemand.  Stem jy?

Ons sing so maklik: Don’t worry be happy… maar is dit werklik so maklik?  Nee, ons almal kwel ons – jy kan nie stry nie.  Wat pla jou vandag?  Wat is dit wat jou koppie die hele dag so besig hou?  Wat is dit wat jou wakker hou deur die nag?  Wat gee jou die knop op die maag, daardie ‘naar‘ gevoel wat jy net eenvoudig met niks kan afsluk nie, nie eers ‘n Bar-One help nie.  Wat is dit?

Ek het vir jou raad:  Petus skryf en se:  NEEM ALLES WAT JOU KWEL… jy het reg gelees.. Let op! ALLES.  Jy kan nie net sekere goed neem en die ander nog aan vas hou nie, dit sal niks help nie. Om ALLES te neem, gaan kos dat jy ‘n keuse moet maak.  Jy sal moet identifiseer wat dit is wat jou kwel en dan neem jy dit ALLES… ja ALLES na Hom toe!  Na Jesus toe!  Ek doen vandag ‘n beroep op jou, wil jy nie net vir ‘n oomblik stil word en besin oor dit wat jou kwel nie..  vat dit dan – ALLES – na Hom toe.

Die geheim is: LOS DIT DAAR BY HOM!  Weet jy, ons almal maak die fout.  Ons gaan so ver om ALLES wat kwel, wel na Hom te neem, maar ons los dit nie by Hom nie.  Ons tel dit ewe weer op en begin dan weer daaroor te kwel of  WORRY!  Ek besef dit is makliker gepraat as gedoen, maar my liewe mens, dit is die antwoord. LOS DIT BY HOM!  Jesus sal nie en kan nie ons probleem oplos as ons Hom nie vertou nie. Hy weet wat om te doen!  Los dit by HOM?

Hoekom? Hoekom sou ons dit dan doen?  Petrus verduidelik:  “Want Hy het verantwoordelikheid geneem vir jou!”  WOW is dit nie great nie! Iemand neem verantwoordelikheid vir my en vir jou!  Jy kan dit – ja dit wat jou kwel –  – na Hom toe neem en dit daar by Hom los! Hy sal sorg!

Sterkte en onthou, Hy is baie lief vir jou EN Hy neem volle verantwoordelikheid vir jou! Glo my: glo die WOORD

Liefies

Karin

Jy oortref hulle almal!

“Jy oortref hulle almal”, hoor ek die dogter aan haar mami se, terwyl sy haar in ‘n greep beet het met die goudgeel bos blomme wat so half oor haar maer ou skouertjies  loer.  Die ou moeder se ogies blink,  ek moes weer kyk; was dit net ‘n blink in die ogies of was dit ‘n traan wat ek gesien het? “Jy oortref hulle almal” is al wat die mami hoor… kan dit waar wees?  Kan dit wees?  Sy klou krampagtig vas; knyp haar oe toe, gryp die agterkant van die dogter se strepies toppie vas terwyl sy net hard aan haar lip moes byt…  kan dit wees..?

Skielig druk sy haar weg, vee hard oor die gesig, en probeer hard om haar ‘pose’ te hou.  “Dankie my kind”, is al wat sy kan uitkry en vat bewerig die goudgeel bos blomme en draai om om dit in ‘n vaas te gaan sit. “Ek bedoel dit, Mami, jy oortref hulle almal” is al wat Elrien kan fluister en gaan sit op die bank en krap in haar groot sak op soek na ‘n tissue.  Hoekom glo sy my nie, hoekom stoot sy my weg?  Wat het veroorsaak dat sy eerder wegdruk, wegstap en selfs wegkyk, as om net ‘n drukkie te gee? Ag wat, miskien eendag! Miskien eendag sal ek ook verstaan. 

Ek sien in die weerkaatsing van die glas van die kombuiskas hoe Mami die blommetjies versigtig een vir een los in die vaas indruk… Geel was nog altyd my kleur van blomme… dankie sussa!  Ja jy het jou knap gedra my kind… baie knap!

Gelukkige Moedersdag vriendin

Spreuke 31:29 – Baie dogters het hulle knap gedra, maar jy oortref hulle almal.

Lief vir jouself?

Ek wonder –  is jy lief vir jouself? Regtig lief?  Net soos jy is?

 Ek lees in Markus 12:30-31 leer Jesus ons dat ons die Here ons God moet liefhe uit ons hele hart en uit ons hele siel en uit ons hele verstand en uit ons hele krag.  Dan gaan dit verder en stel die volgende daaraan gelyk: Jy moet jou naaste liefhe soos jouself.

Ek het hieroor gaan sit en dink! Soos jouself?  Maar wat as jy jouself nie liefhet nie?  Hoe kan jy lief he ‘soos jouself’ ‘as jy nie eers van jouself  hou nie.  Die beeld wat jy in die spieel sien, staan jouself glad nie aan nie.  Jy hou nie van wat jy sien nie – hierdie persoon het jou al soveel keer teleur gestel.  Die persoon in die spieel is die persoon wat jou al soveel in die steek gelaat het…  so kan jy aangaan! So die vraag is: hoe kan jy lief wees ‘soos jouself’?

Is dit nie die rede hoekom ons land is wat dit is nie?  Is dit nie hoekom jy nie kan verstaan hoe mens werklik lief kan he nie…  Is dit nie die rede hoekom jy so ongelukkig is nie? Jy het net eenvoudig nie lief nie!

Wil jy nie vandag net ‘n bietjie weer vir ‘n slag in die spieel gaan kyk en vasstel wat dit is wat jou so kwaad en teleurgesteld het in die persoon wat jy moet kan liefhe nie?  Eers dan sal jy ander, jou naaste, werklik kan leer liefhe!

Gebed: Here, met my mond bely ek vandag dat ek U liefhet met my hele hart, verstand en siel. Help my en vergewe my waar ek faal om ander lief te he, en dit omdat ek myself nie lief het nie.  Help my, om dit wat verkeerd gegaan het, te ontdek, sodat ek meer van myself ook kan hou en sodoende ander kan leer liefhe. Amen